ஒரு போட்டியில் கூட ஆடாத வீரருக்கு இடம்? கம்பீர் தேர்வால் அதிருப்தியில் பிசிசிஐ!

ஒரு ஒருநாள் போட்டியில் கூட விளையாட வீரரை சாம்பியன்ஸ் டிராபிக்கான இந்திய அணியில், சேர்க்க வேண்டும் என கம்பீர் கோரிக்கை வைத்திருப்பதால் பிசிசிஐ அதிருப்தியில் உள்ளதாக தகவல் வெளியாகி இருக்கின்றது.

சாம்பியன்ஸ் டிராபிக்கான இந்திய அணியை, ஜனவரி 12ஆம் தேதிக்குள் கொடுத்தாக வேண்டும் என ஐசிசி அறிவித்துள்ள நிலையில், அணித் தேர்வை பிசிசிஐ தீவிரப்படுத்தி உள்ளது.

இந்த நிலையில், ஒரு ஒருநாள் போட்டியில் கூட விளையாடாத, தமிழக ஸ்பின்னர் வருண் சக்ரவர்த்தியை 15 பேர் கொண்ட இந்திய அணியில் சேர்க்க வேண்டும் என, பிசிசிஐயிடம், தலைமை பயிற்சியாளர் கௌதம் கம்பீர் கோரிக்கை வைத்து உள்ளாராம்.

கொல்கத்தா நைட் ரைடர்ஸ் அணி ஐபிஎல் 17ஆவது சீசனில் கோப்பை வென்றபோது, ஆலோசகராக கௌதம் கம்பீர் இருந்த நிலையில், அந்த அணியில் ஆடிய வருண் சக்ரவர்த்தி அபாரமாக பந்துவீசி, கம்பீரை கவர்ந்துவிட்டார்.

இதனையடுத்து, சாம்பியன்ஸ் டிராபிக்கான இந்திய அணியில், சக்ரவர்த்தியை எப்படியாவது கொண்டுவர வேண்டும் கம்பீர் விரும்புவதாக கருதப்படுகிறது.

இந்திய அணியில், ஏற்கெனவே ரவீந்திர ஜடேஜா, அக்சர் படேல், குல்தீப் யாதவ், ரவி பிஷ்னோய், வாஷிங்டன் சுந்தர் போன்றவர்கள் உள்ளதுடன், அதில், குல்தீப் யாதவின் இடம் கிட்டதட்ட உறுதியாகிவிட்டது. 

மற்றொரு இடத்திற்கு அக்சர் படேல், வாஷிங்டன் சுந்தர் இடையில் போட்டி இருப்பதாகவும், ரவீந்திர ஜடேஜாவை இனி ஒருநாள் அணியில் சேர்க்க வாய்ப்பில்லை எனக் கூறப்படுகின்ற நிலையில், வருண் சக்ரவர்த்தி கண்டிப்பாக வேண்டும் என தலைமை பயிற்சியாளர் கௌதம் கம்பீர், வலியுறுத்தி வருவது, பிசிசிஐ தேர்வுக்குழு மத்தியில் அதிருப்தியை ஏற்படுத்தி உள்ளது.

ஏற்கெனவே, ஆஸ்திரேலிய டெஸ்ட் தொடருக்கு ஹர்ஷித் ராணா, நிதிஷ் ரெட்டியை அழைத்துச் சென்ற நிலையில், ஹர்ஷித் ராணாவின் பந்துவீச்சு, ஆஸ்திரேலியாவில் சுத்தமாக எடுபடவில்லை. நிதிஷ் ரெட்டி பேட்டிங்கில் அபாரமாக செயல்பட்டாலும் பந்துவீச்சில் படுமோசமாக சொதப்பினார். 

இந்நிலையில், மீண்டும் தனக்கு பிடித்த ஒரு வீரரை கம்பீர் கேட்டிருப்பது, பிசிசிஐ நிர்வாகிகள் மத்தியில் அதிருப்தியை ஏற்படுத்தி உள்ளது. சமீபத்தில் விஜய் ஹசாரே டிராபி தொடரில், ராஜஸ்தான் அணிக்கு எதிராக வருண் சக்ரவர்த்தி, 5 விக்கெட்களை கைப்பற்றி அசத்தியிருந்தார். ஐபிஎலில் 70 போட்டிகளில் விளையாடி உள்ளார்.