பாகிஸ்தானுக்கு செல்லும் ரோஹித் சர்மா... ஐசிசி விடுத்த கோரிக்கை... பிசிசிஐ இணக்கம்?

1996ஆம் ஆண்டு ஒருநாள் உலகக் கோப்பைக்கு பிறகு, வேறு எந்த ஐசிசி தொடரும் பாகிஸ்தான் மண்ணில் நடைபெறவில்லை. அச்சுறுத்தல் காரணமாக, சில ஆண்டுகள், சர்வதேச அணிகள் பாகிஸ்தான் செல்வதை தவிர்த்து வந்தது. 

இதனால், ஐக்கிய அரபு அமீரகத்தைதான், பாகிஸ்தான் அணியானது தனது மைதானமாக பயன்படுத்தியது. தொடர்ந்து இங்கிலாந்து உட்பட சில அணிகள் பாகிஸ்தான் சென்று கிரிக்கெட் விளையாட ஆரம்பித்தார்கள். 

சாம்பியன்ஸ் டிராபிக்கான இந்திய அணி: ஒரு இடத்திற்கு கம்பீர், அகார்கர் இடையே இழுபறி!

இதனால், 2025ஆம் ஆண்டிற்கான சாம்பியன்ஸ் டிராபி தொடரை நடத்தும் உரிமையை பாகிஸ்தான் கிரிக்கெட் வாரியம் போராடி வாங்கியது. சாம்பியன்ஸ் டிராபி 2025 தொடரில் பங்கேற்க மற்ற 6 நாடுகள் ஒப்புக்கொண்ட நிலையில், இந்தியா மட்டும் ஒப்புக்கொள்ளவில்லை. 

இந்த விவகாரம் குறித்து பாகிஸ்தான் கிரிக்கெட் வாரியம், பிசிசிஐயுடன் ஐசிசி தொடர்ந்து பேச்சுவார்த்தை நடத்தி வந்த நிலையில், இறுதியில், இந்தியா பங்கேற்கும் போட்டிகளை மட்டும், துபாயில் நடத்த பாகிஸ்தான் கிரிக்கெட் வாரியம் ஒப்புக் கொண்டது. 

இந்திய அணியானது அரையிறுதி, இறுதிப் போட்டிக்கு முன்னேறினாலும், இந்திய போட்டிகள் துபாயில்தான் நடைபெறும். இந்நிலையில், இந்திய அணிக் கேப்டன் ரோஹித் சர்மா, பாகிஸ்தான் செல்ல உள்ளதாக தகவல் வெளியாகி இருக்கின்றது.

ஒவ்வொரு ஐசிசி தொடருக்கும் முன், போட்டிகளை நடத்தும் நாட்டில் ஐசிசி கோப்பையுடன் அனைத்து நாட்டு கேப்டன்களும் குழுவாக புகைப்படம் எடுப்பது வழக்கம் என்ற நிலையில், போட்டிகளை பாகிஸ்தான் நடத்துவதால், இந்திய அணிக் கேப்டன் ரோஹித் சர்மா இந்த நிகழ்ச்சியில் பங்கேற்க உள்ளார்.

மேலும், குழு புகைப்படம் எடுத்தப் பிறகு இடம்பெறும் பத்திரிகையாளர் சந்திப்பில் ரோஹித் சர்மா பங்கேற்க வாய்ப்பு இருப்பதாக கருதப்படுகிறது.

பிசிசிஐ முன்னாள் செயலாளர் ஜெய் ஷா தற்போது ஐசிசி தலைவராக உள்ளதால் அவரும் அந்த நிகழ்வுகளின்போது உடன் இருப்பார் என்ற உத்தரவாதம் கொடுக்கப்பட்டுள்ளதால்தான், ரோஹித் சர்மாவை பாகிஸ்தானுக்கு அனுப்ப பிசிசிஐ ஒப்புக்கொண்டிருப்பதாக கூறப்படுகிறது. 

இதற்குமுன் ஒருமுறை கூட ரோஹித் சர்மா பாகிஸ்தானுக்கு சென்றது இல்லை. 2008ஆம் ஆண்டிற்கு பிறகு, இந்திய அணி சார்பாக பாகிஸ்தானுக்கு செல்லும் முதல் இந்திய கிரிக்கெட் வீரர் ரோஹித் சர்மா என்பது குறிப்பிடத்தக்கது.